Дунияллийн уттигу увккун акъар уттарашиврул шин хIарчIун, абадлий сагъну личIансса инсан. Махъгу-хьхьичIгу бивкIу цумацаннаягу яла къалагай. Амма укун бивкIу ялугьлайма бушиву, тава-тагу абадул къатлувун гьантIишиву чIявуминнан дакIний къабикIай. Ва яла къалагайсса иш дакIнийну дунияллий оьрму бутлатавугу гьарцаннал биттур буллан аьркинсса, мубараксса инсаншиврул буржиран ккалли бай.

Мартрал ацIния ххюнний рахIму бакъасса, лавмартсса бивкIулул чIун дакъана ахиратрал къатлувун увцунни Ккуллал шяраваллингу, жяматрангу, щалла районналул агьалийнангу хъинну бусравсса, чIявучин мюнпатранну дурсса ххаллилсса давурттайну, цалла инсаншиврийну, дакI хъиншиврийну ва дугъришиврийну республикалий ва мунил кьатIувгума цIа машгьурсса, дяъвилул ва захIматрал ветеран, насихIатчи ХIажиев МахIаммад-ХIажи ХIажиевич.

МахIаммад-ХIажинал бувтсса, личIийну хъун бакъасса щалвагу оьрму хъинну лажин кIялану, чаннану, чIявучин эбратранну лавгссар.

Буттал шяраву – Ккулув диял дакъа дянивмур даражалул кIулшивугу ларсун, хъирив бухгалтертал шайсса курсругу къуртал бувну, 1941-ку шинал айивхьун ур ва Гьарун Саэдовлул цIанийсса колхозрал счетоводну. 1943-ку шинал цува хушрай лавгун ур Ватан душманная ххассал дан. Гьуртту хьуну ур ттупчитурал полкравух Украина, Закарпатия, Венгрия, Австрия немецнал чапхунчитурал ххяппула ххассал буллай.

1952-ку шинаяту 1988-ку шиналнинсса МахIаммад-ХIажинал оьрму Гьарун Саэдовлул цIанийсса Ккуллал колхозрацIун бавхIусса бур: хъунама бухгалтерну, председательну, хъунама экономистну, парткомрал секретарьну.

Лениннул, ЯтIул ттугълил, Хъунмасса Буттал кIанттул цIанийсса дяъвилул орденну, ацIния цара личIи-личIийсса медаллу, ХIурматрал грамотартту, дипломру ва цаймийгу чIяру-чIярусса бахшишру.

Амма, утти жуятува личIий хьуну аьпалувух хьуну махъ, МахIаммад-ХIажи ХIажиевичлун яла хъунмур бахшишну хьунссар ванал арсру, душругу ванаха лавхьхьусса, ванал рухIиран къаччан бикIан бансса даву къадуллалисса шаву. ЦIанассарив ванийнсса щакгурив бикIан къабюхъанссар.

МахIаммад-ХIажинал бюхттулсса чурх, дугърийсса, аьчухсса дакI, муданна пиш тIисса симан абадул абадлий дакIний личIантIиссар ванащал архIал зий бивкIмийннан ва кIулнан, дазу-зума дакъа чIявусса дустуран, гьалмахтуран.

Ххаллилсса инсанная аьпалун личIаймургу вана вари.

Аьпа баннавча вил, МахIаммад-ХIажи!

Гь. ХIасанов

Даградио

15 март 1997 ш.

КАДРАРДАЛЛИ ДАВУ ДАЙССА

МахIаммадхIажи колхозрал председательну, парткомрал секретарьну зузисса чIумал хъинну чул бишлай, давриву цала лаган буллай, миннал бюхъу-тяхъа ххихьунмур буллай, даврихсса гъира, шавкь гьаз дансса, ялун хъиннува ххуймур бучIантIишиврийн вихшала дишин буллай икIайва колхозрал захIматчитурай, хаснува отраслирдай каялувшиву дуллалими, специалистал, актив.

Аьпабивул хъинну кIула цувалу зий даву щаллу дан къабюхъайшиву. Ванан ххуйну кIула гьарцаманай цуманай ци мискьал дуссарив. Анавар къауккайва чIири-хъунсса диялдакъашиву итадаркьуннича тIий инсан зия ан, даврия укьан ан. Яла-яла ххирая цаща-цащалалу, жула тIикун, дакIнихтуну ихтилат бан, вихшала дишин бан, дакIнимур бусан бан. Правлениялул заседаниялий ягу колхозрал собраниялий зузала оькки ансса, дакI дякъин ансса ихтилат цалагу къабайва, буллалимагу къаитайва, яни аьйкьуннича тIий кьюнуравух къауккайва. Га инсан колхозран гьунттигу аьркин шайшиву кIула. Цума-унугу каялувчиначIа чан къашайхха лажин лякъулий, ванийну цанна къулайшиву ласун ччимигу. Амма бия ваначIагу колхозниктураву «цалами», «чилми», «дустал», «къадустал» хьун къабитан хIарачатрай чIалан икIайва. Чан къашайва вайминнава личин, «председательнал лажин лякъин, бурушин бан, махъа махъ гьалмахтурая мунахь бусласаврину цивппа гьаз хьун ччимигу. Амма МахIаммадхIажинан кIула мукунмигу. КIула лачIавун хIала хъагу, ххюлгу бакъа къабикIайшивугу. Амма багьайсса кьимат бищун лайкьми багьавай хьхьичIунмай баннив хъама къабитайва. Бия хIакьсса дустал гьарца отраслилий зузиминнавугу. Ччиманащал маз лякъайва. ДакI хъуншиву, инсан ккалли къааву, чIявучива уклаккаву муначIа дакъая. КIула циняв инсантал бушиву. Хъамалу хьун, щяикIан, изан, аьркинний махъ бусан, иш багьний цала зузалтрал чIарав ацIан, ка-кумаг бан хIадурнува икIайва. Къаанавар уккайва агьманай кадизан. Увччухьуну даврий ккавкма ягу цачIана увкIун ссизибан буллалиссагу чан къашайва. Укунминнан танмихI бан, оьвкуну милицанайн багьайсса ххуллийн уцин багьлай буна, анавар къаувккуну цайми ххуллурду лявкъун, хъирив цува тахсиркар багъишла ити тIий, лергъ тIий букIлакIисса ишру цикссагу шайва. Ххирая аьпабиву чIявучин, хаснува дакIнихтунусса захIматчитуран. Вихшалларай мунахь цала дакIнимур бусан, муная кумаг тIалав бан махъал къашайва. Цанчирча му хIадурну икIайва мукунминнал чIарав ацIан. Ххаралунсса махъ бусаву ваначIа дакъашиву чIявучин ххуйну кIула, иширайну цалагу ккаккан байва. Вихшалагу ири-иривманайн къадишайхха.

Утти МахIаммадхIажи дакIнин утлай, ччай бур цаппарасса та чIумал ванал канил ка дургьуну хьхьичIунну зий, цIанихсса захIматрайну цивппагу гьаз хьуминнаясса цаппаранная кказитирттай чивчумур зунгу цIунил ашкара бан. Цанчирча, аьпабивул цалагу чIурчIав дайссия, ттул захIматчитуран, специалистурал, ризкьичитурал, механизатортурал ччаннайра колхоз дарцIун дусса, куну. ТIайлар, «кадраналли даву дайсса». Амма каялувчи, сакиншинна дуллалимагу акъа чара бакъассар. МахIаммадхIажи.

Муданагу цIарду дуллайна икIайва цIанихсса ризкьичитурая, цала заместительтурая ва отраслирдал бакI дургьуминная. Хаснува хъунисса давуртту дурссар ХIасан Рамазановлул, Юсуп Рамазановлул, Шагь Худиевлул, Шагьи Жабраиловлул, МахIаммадхIажи ЩайахIмадовлул, МахIаммад Мурачуевлул, уссурвал МахIаммада ва Оьмари Маммахъал, МахIаммад Исмяиловлул, Муси Оьмариевлул, МахIаммад МахIаммадовлул, Тамари Амировал, Гъази Мусиевлул ва чIявусса цаймигу председательнал кумагчи, чIарав бацIулт, цайнна дурсса вихшала дакIнихтуну барт дигьлай бивкIсса захIматчи-колхозниктал. Вайннаятусса утти так-тук акъа сагънугу ливчIун акъар.

Бунагьирттал аьпа баннавча!

Гь. ХIасанов

ШАВКЬ ДУНУ ЗУЗИССА ЧIУМАЛ

Николай замана ккавкминнан, мунияргу Совет хIукуматрал дайдихьулий оьрму бутан кьисмат хьуминнан личIинува бувчIлай бия МахIаммадхIажи колхозрал председательну зузисса чIумал гьарчулуха баххана хьусса оьрмулул тIааьн. Ккулув хавар бикIайва ца хъуначу ивкIлакIиний ия тIар нава ивчIангу чIиви акъара, гьаксса ччива цахъи жагьилну, ва заманагу ккавккун, .................. кьабивтун, га дунияллий гьаттал кьамул къаанссара. Амма хъунмур цамургу бур, цIанакул та жува кура-кирилийн лагайсса магъу даралувух автомашинарттай занай буссар, радиорттур тIий балайрду тIий, ххаллавух дунияллул заманая куннахь кув гъалгъа тIий, электричествалул чаннал къатри перхха тIий, инсантал гьаваллавух лехлай, къатри къалмул бувцIун буссар тIий, на бусласимунийн гай ттула жагьилнийсса дустал вих бан къахъанай, инжит анссара. Мунил бур хъунмур пикри, тIий.

Жула тIикун, цIан къаккавкнан чаннал кьадру къабикIайссархха. Оьрму мюхтажнува, чIирисса аьрщарая гуж-къиялий, карунних дугьлай, ттихIлай, дучIан дурсса бакIлахъиялул бакI дулан бан къахъанай, личIи-личIисса санятру язи дургьуну, бакъа чаралул, яхI-рухIгу кьацIул дургьун, тиху-шихунмай хIалтIилухун, кура-кирилийн занан бивкIссар.

«Лякьа дуний ччатI бакъая, утти ччатI буний лякьа дакъар. Ва ялувасса алжан ххал къавхьунма гьан къабучIия, вавагу ккавккун хъинача», – тIий МахIаммадхIажинаха личIинува зукьлан бикIайва оьрмулул бугьарами. Амма цащава шаймур мукъуйну ва иширайнугу къабуллай къабацIайва. Колхозрал къурнил, фермардал бригадирталну, мукунма ятти-гъаттарачIагу жагьилминнащал зийнма бия хъунимигу. ХIатта къурайзу-къаралчиталнугума зийнма цащава шаймур буллай, оьнма бацIлай бакъая.

Жагьилминнан эбрат ккаккан дуллай, дакIнихтуну зий бия: Аьли ЩайххIасанов, МахIамма Аьлиев, Юсуп Кьубиев, Мархха КьурбитI, Кьубалав Аьли, Амучи АхIмадханов, МахIа Мурачуев, Касак Рамазан, Ихухъал МахIамма, Апанни Аьлил, Тарибирди ХхупIукухъал, Закайхъал Аьвдуллагь, Аьли, Рамазан, Гьабза Муси, АьматIу АхIма, Бикахъал МахIамма, Ккиз Ирбагьин, БухIан, уссурвал Асадуллагь, Абакар, чIявусса цаймигу.

Тай дяъвилул шиннардий хьхьуния кьини дурну, жанная ка ларсун зузаврил аьйплу хьусса хъуни хъамигума оьнма бацIлай къабикIайва. Бригадирталну, звеноводкахъулну зий, цивппагу махъминнан эбратранну зузисса хъами чансса бакъая. Школа къуртал бувсса оьрчIру, душру колхозраву зун бавцIуну хIухчалтну, дояркахъулну ва цайми давурттай зий бия. ДакIнихтуну колхозраву зузиманан лякьа дуччинсса ччатI лякъаврищал, бусравшиву, хIурмат жяматрал дянив бушиву иширайну бувчIлай. ДакIния къабуккай фермалий гъаттара хIухчуну хьхьичIунну зузисса Алхасов Кировлул цанна кIира зивулийсса ххаллилсса къатригу дурну, «Москвич» автомашинагу буллусса чIун дия. ХIакинну зузисса ванал уссил ххаришиврулъяв ягу ванай мяш хъанайяв къакIула, «бургирартал шиккун ваксса хIаллай хIакинну зий, на ттунна духIин дусса лаххия ласун къахъанай уссара, хIухчуну зий ттул уссил?..» На хъярч бав, хIухчуну гьан багьанссар туну вингу, чIаххувчу, куну. «Гьарчагу му кьюкьаласса зад бакъар, амма духтур хъанай ряхра-арулла шинайсса ттула захIмат?» – хъярчра буллалисса тIий, хъяй ур.

Мяйжаннугу, колхозравугу жяматран, обществалунгу мюнпатну дакIнихтуну буллалисса захIматрал буллугъшиву, мунил инсаннал сий гьаз дуллай, лахъа-хъун айшиву, колхозравугу инсан цахава, цанмагу хъинбалларанну зий ушиву иширайну исват хъанай бия. Укун зий буну тIийяхха: доярка ХIалимат Кьурбанова, фермалул бригадир Сяид ХIасанов СССР-данул Верховный Советрал депутатъталну, доярка Ххажа Раджабова ДАССР-данул Верховный Советрал депутатну, яттихIухчу НурмахIаммад Аьдуевлун Социалист ЗахIматрал Виричушиврул цIа дуллусса, оьрмулухунсса яттихIухчу АхIмад Кьурбидаевлун Октябрь революциялул орден дуллусса.

Вай мисаллу чIявусса буцин бюхълай бур.

Вай иширттаву тIурча МахIаммадхIажи ХIажиевлул хъунмасса, хъинну хъунмасса бияла барт бивхьуссар чивияв. Жямат ва даражалийн биян бан, колхозрал цIа билаятрайхгу машгьур дан, яни агьалинал цIаний аьпабивул цалла цIуллу-сагъшиву хъамаритан дурссар. Ванину чIалай буна цала оьрму кутIа бувссар. Цикссаннангу бансса хъинбала ливчIссар. Яла-яла цIанихсса колхозрал ахир хъанахъаврин дайдихьу хьуссар. Укун хъанахъавугу ванал дакIнивусса кьартIану хьуссия. Вив кьуркьу уллайна уссия. ХIайп.

МахIаммадхIажинан кIула инсаннал кьимат бищун, бюхъавай дакI хьунмур, гъира гьаз хьунмур буллан.

Гъабза Муси ванал чIаххувчуя, шяраву хIурмат бусса хъуначу, захIмат ххирасса адамина ия. Ца ппурттуву къурнил бригадалул каялувчинугу уссия яла махъ ванал къуллугъ душнил душ Бикахьгу буссия. Бика оьрмулувугу мадара бакIран ккавксса, хъинну замабакIгу ххуйсса, хъяйнма-пиштIий бакъа зумакъабахъайсса, дакI хъинсса, карчI дакъасса инсан бия. Вай шиннардий корреспондентътурал чIявусса чивчуна вания, МахIаммадова Саккибатлуя, Муъминат Базаевая, БатIал МахIудовая, Кубра АхIмадова, ХIалима Кьурбановая ва тамансса цаймигу каялувчиталну, дояркахъулну зузисса хъами-душварая.

Ттула архивраву канилун дагьунни аьпабиву Гъабза Мусия ва мунал душнил душ Бикалиясса «Дагъправдалий» рирщун диркIсса ва макьалагу. Къагьарза хьунхьуви вагу куну, таржума къадурнува итадакьин дакIнин багьуннича, дуккияра вагу. Ванинугу чIалачIиссар, цукун шавкьирай зий бивкIун бур утти зия дурну экьилирчусса Гьаруннул цIанийсса хъун колхозраву.

РАДОСТЬ СТАРОГО МУСИ

Высокая, худощавая. Крепкие натруженные руки. Строгое, обветренное лицо. Бика Цахаева – простая женщина из селения Кули Кулинского района. Таких в Дагестане немало – скромных, трудолюбивых, немногословных.

Бика рано потеряла отца. Мать осталась жить с сыном, а маленькую дочь отдала на воспитание бездетному брату – Муси. Его Бика и считает своим отцом.

Старый колхозник Муси привил дочери любовь к родной земле. Муси помнит свой аул маленьким, с тёмными саклями, без стёкол, с глиняным полом. В этих домиках протекла полная лишений и забот жизнь. Глядя, как утром сельчане на собственных легковых машинах и мотоциклах отправляются на работу, Муси завистливо смотрит им вслед. «Где моя молодость?»

Ему уже 92 года, но он по-прежнему живёт интересами сельхозартели. Когда хорошо себя чувствует, работает наравне со всеми в поле. В прошлом году Муси выработал сто трудодней. Старик, конечно, гордится этим. Но самая большая его гордость – это дочь Бика.

Начала она трудиться ещё во время войны: училась в восьмом классе и работала учётчицей в колхозе. А после окончания школы пошла на ферму дояркой.

Работа девушке очень нравилась. Но с ней пришлось расстаться, так как ферма была расположена далеко от селения. А здоровье отца и матери было неважным. Чтобы иметь возможность смотреть за родными, Бика перешла в полеводческую бригаду.

Аккуратная, длбросовестная, Бика всегда выполняла норму. В каждом коллективе ценят людей с такими качествами.

Молодая женщина вот уже несколько лет руководит бригадой. А она немалая: более 130 колхозников. Бика не жалуется. Слушаются её полеводы. В своей работе опирается на актив: звеньевых Г. Ибрагимову, А. Курбанову, А. Сулуеву и И. Алиеву. Утром соберёт их, посоветуется и вместе решат, кто, где должен работать. А вечером звеньевые докладывают Бике, как прошёл день.

Сейчас в разгаре сенокос. Мужчин посылают, конечно, на более трудный участок – в горы, женщины – одни собирают сено, другие сушат и сгребают его, третьи скирдуют. Уже заготовили сотни центнеров корма. Надо ещё припасти не меньше 1600 центнеров.

В соревновании по колхозу имени Гаруна Саидова бригада Цахаевой идёт второй. Бика мечтает перегнать коллектив Омара Рамазанова и завоевать вымпел победителя.

На мой вопрос, какие у Бики самые радостные минуты в жизни, она ответила:

– Я мать двух дочерей. Мечтаю, чтобы Лида стала врачом, а её младшая сестрёнка Сиясат – учительницей. Никогда не забуду избрание меня депутатом сельсовета. Есть ещё один знаменательный день в моей жизни – 7 ноября прошлого года...

Позднее сельчане рассказали мне, как на площади, во время праздничного митинга председатель колхоза Магомедгаджи Гаджиев вручал передовикам подарки.

– Бригада Бики Цахаевой, – сказал он, – при плане 80 центнеров собрала картофеля по 130 центнеров с гектара. Гороха при плане 10 – 30 центнеров с гектара. Озимой пшеницы при плане 11 центнеров с гектара – по 18 центнеров. – Учитывая тяжёлые погодные условия, это хорошие показатели, – заключил он. – Отмечая большую работу Бики, награждаем её золотыми часами.

После митинга многие сельчане подходили к Бике, поздравляли её. Не забыли поздравить и дедушку Муси, воспитавшего замечательную труженицу.

Муси всегда внимательно слушает сообщения местного радио, читает районную газету, в которой рассказывается о делах бригады его дочери. И когда Бика говорит, что в этом году соберёт урожай больше прошлогоднего, Муси верит: так оно и будет. Он-то хорошо знает её настойчивый характер.

Г. Разилова

МУСИЕВ ГЪАЗИ МАЛЛАЕВИЧ

Колхозрал чIяруми давуртту техникалул кумаграйну дуллай дия. Хаснува чIяруми давуртту: хъуру дугьаву, ттихIаву, ххулу хIадур баву, хъинну хъунмасса кормоцех бувну, гиву грануллу дуллалаву, лазу ва бакIлахъия Лаккуйн духхаву, лазуни Бакреслив дичаву ва цаймигу давуртту щаллуну механизироват дурну, яни автомашинардал ва трактордал кумаграйну дуллай бия. Мукунна – Бакресливгу.

Вай автотранспорт ва махъсса шяраваллил хозяйствалул техника дацIан къадиртун, лябукку ххину щурущи даву хъар хъанай дия миннулсса буллалисса, техникалул хIал кIулсса, дакIнихтуну цала буржру биттур буллалисса инженер-механиктурая. Мукунминнаву ца яла хьхьичIунсса механикну уссия аьпа баннав цал, ччяни, хъинну ччяни азаруннил жуятува личIи увсса Мусиев Гъази Маллаевичгу.

ЧIивину цува унува ппугу ялату лавгун, ятиншивугу ккавккун, канил захIматрал кьадругу кIул хьусса Гъази ниттила техникалулсса буллан тIиникуна увсса хханссия.

ЧIярусса захIматшивуртту духIан ва миннуяр ххув хьун багьссия Гъазин, лахIан ан къаавцIуссия.

Буттал шяраву 7 классгу бувккун, ЧIяв дуклай уна, цала хъунмур ссу бувсса шин ванайн дагьну, кIира шинал хьхьичI аьралуннаву къуллугъ буллан увцун, сайки 3,5 къуллугъ бувссар Закаталлай ниттил ссурахъарачIа ссяткаршиву лахьлай, ца шингу дурссар.

Вания махъ ца механизатортурал хIадур бай училище къуртал бувну, хъирив бувкссар техникумгу.

Зий уссия Бакрессуллал МЖС-рай, хъирив Бакресслив колхозраву, вания махъ тIурча 18 шинал мутталий колхозрал Бабаюртливсса трактордал паркрал техник-механикну.

Шикку цала колхозралмур техникалулсса цила багьайкун щаллу баврищал, чIаххувсса вайми колхозирттал техника зия хьуну, запчасть аьркинний – ГъазиначIа лечайсса хьхьу-кьини къакуну зунгу багьайва, хаснува сезонналул чIумал.

Цала буржру намусрай, даврий дакI-лякьа цIий щаллу буллалаврихлу Гъази Маллаевичлул чIярусса бахшишругу дуллуссар колхозрал, райкомрал, райисполкомрал, республикалул чулухасса ва цаймигу цикссагу бахшишру, дакIний личIансса ссайгъатру.

Вайнна миннувасса цаппара: «ЗахIматраву цIа ласаврил» III даражалул орден, «ЦIанихсса захIмат буллалаврил» медаль, СССР-данул ВДНХ-лул чулухасса чарвитIул медаль, «Щалагу Союзрал механизатортурал дянивсса конкурсраву ххувшаврил» лишан, соцбястраву ххув шаврил цимирагу шинал лишанну.

Ва каялувшиву дуллалисса механизатортурал бригада цимилагу соцбястливу ххув хьумунин ккалли хьуну, хъунисса бахшишру ларсъссар.

Гъази цува чил билаятирттайн турист хIисаврай украсса путёвкалийгу лавгссар.

Та чIумал районнай хьхьичIунминнан бакъа куклу автомашинартту къабулайссия, яни райисполкомрал хIукму байссия, хьхьичIунсса механизаторнан, ризкьичинан булун куну. Мукун районналий хьхьичIунсса механизатортурал бригадир хIисаврай Гъазингу буллуссия куклу автомашина.

Гъази Маллаевич лавмартсса азаруннил ччяни жуятува личIи увуна. Му акъашиву личIинува иширайну чIалан бикIайва районналийсса махъми колхозирттал давурттавугу. Гъази цала пиша дакIнихтуну ххирасса, карчI дакъасса, даву кIулсса захIматчи, дакI хъинсса инсан ия.