Прейде сень законная, благодати пришедши: / якоже бо купина не сгараше опаляема, / тако Дево родила еси, / и Дева пребыла еси. / Вместо столпа огненнаго, / праведное возсия Солнце: / вместо Моисеа, // Христос, спасение душ наших.

Глас 3-й:

Твоим Крестом, Христе Спасе, / смерти держава разрушися, / и диаволя прелесть упразднися; / род же человеческий, верою спасаемый, // песнь Тебе всегда приносит.

И ныне: Богородичен, глас 3-й:

Како не дивимся Богомужному рождеству Твоему, Пречестная? / Искушения бомужескаго не приемши, Всенепорочная, / родила еси без отца Сына плотию, / прежде век от Отца рожденнаго без матере, / никакоже претерпевшаго изменения, или смешения, или разделения, / но обою существу свойство цело сохраншаго. / Тем же, Мати Дево Владычице, / Того моли спастися душам // православно Богородицу исповедающих Тя.

Глас 4-й:

Животворящему Твоему Кресту / непрестанно кланяющеся, Христе Боже, / тридневное Воскресение Твое славим: / тем бо обновил еси истлевшее человеческое естество, Всесильне, / и Иже на Небеса восход обновил еси нам, // яко Един Благ и Человеколюбец.

И ныне: Богородичен, глас 4-й:

Иже Тебе ради Богоотец пророк Давид / песненно о Тебе провозгласи / величия Тебе Сотворшему: / предста Царица одесную Тебе, / Тя бо Матерь ходатаицу живота показа, / без отца из Тебе вочеловечитися благоволивый Бог, / да Свой паки обновит образ истлевший страстьми, / и заблуждшее горохищное обрет овча, / на рамо восприим, ко Отцу принесет, и Своему хотению, / с небесными совокупит силами, / и спасет, Богородице, мир, // Христос, имеяй велию и богатую милость.

Глас 5-й:

Честным Твоим Крестом, Христе, / диавола посрамил еси / и Воскресением Твоим жало греховное притупил еси, / и спасл еси ны от врат смертных: // славим Тя, Единородне.

И ныне: Богородичен, глас 5-й:

В Чермнем мори / неискусобрачныя Невесты образ написася иногда. / Тамо Моисей – разделитель воды: / зде же Гавриил – служитель чудесе. / Тогда глубину шествова немокренно Израиль; / ныне же Христа роди безсeменно Дева. / Море по прошествии Израилеве пребысть непроходно; / Непорочная по рождестве Еммануилеве пребысть нетленна. / Сый и прежде сый, / явлейся яко человек, // Боже, помилуй нас.

Глас 6-й:

Победу имея, Христе, юже на ада, / на крест восшел еси, / да во тьме смерти седящия воскресиши с Собою; / Иже в мертвых свободь, / источаяй живот от Своего света, // всесильне Спасе, помилуй нас.

И ныне: Богородичен, глас 6-й:

Кто Тебе не ублажит, Пресвятая Дево? / Кто ли не воспоет Твоего пречистаго Рождества? / Безлетно бо от Отца возсиявый Сын Единородный, / Тойже от Тебе Чистыя пройде, / неизреченно воплощься, / естеством Бог сый / и естеством быв Человек нас ради, / не во двою лицу разделяемый, / но во двою естеству / неслитно познаваемый. / Того моли, Чистая, Всеблаженная, // помиловатися душам нашим.

Глас 7-й:

Приидите, возрадуемся Господеви, / сокрушившему смерти державу / и просветившему человеческий род, / со Безплотными зовуще: // Содетелю и Спасе наш, слава Тебе.

И ныне: Богородичен, глас 7-й:

Мати убо позналася еси / паче естества, Богородице, / пребыла же еси Дева / паче слова и разума, / и чудесе рождества Твоего сказати язык не может, / преславну бо сущу зачатию, Чистая, / непостижен есть образ рождения; / идеже бо хощет Бог, побеждается естества чин. / Темже Тя вси Матерь Божию ведуще, / молим Ти ся прилежно, // моли спастися душам нашим.

                                                                   Глас 8-й:

Вечернюю песнь / и словесную службу / Тебе, Христе, приносим: / яко благоволил еси помиловати нас // воскресением.

И ныне: Богородичен, глас 8-й:

Царь Небесный за человеколюбие на земли явися, / с человеки поживе: /от Девы бо чистыя плоть приемый / и из Нея прошедый с восприятием; / един есть Сын, сугуб естеством, / но не Ипостасию. / Темже совершенна Того Бога / и совершенна Человека воистину проповедающе, / исповедуем Христа Бога нашего: / Егоже моли, Мати Безневестная, // помиловатися душам нашим.